ଗଞ୍ଜାମ ଜିଲ୍ଲା ବଜ୍ରପାତରେ ପ୍ରାଣ ହରାଇଛନ୍ତି ଜଣେ ଯୁବକ, ତିନି ଗୁରୁତର।

ଗଞ୍ଜାମ ଜିଲ୍ଲା ଚିକିଟି ବ୍ଲକରେ ଘଟିଛି ଏକ ଅଭାବନୀୟ ଘଟଣା। ବଜ୍ରପାତରେ ଜୀବନ ହାରିଛନ୍ତି ଜଣେ ବ୍ୟକ୍ତି। ଶୁକ୍ରବାର ବଜ୍ରପାତରେ ଚାନ୍ଦପୁର ପଞ୍ଚାୟତ ହରିପୁର ଗ୍ରାମର ଶିବ ପାଇକଙ୍କ ଘଟଣା ସ୍ଥଳରେ ମୃତ୍ୟୁ ଘଟିଛି। ଶିବ ଓ ଅନ୍ୟ ତିନିଜଣ ବନ୍ଧୁ ଛେଳି ଚରେଇବା ପାଇଁ ଯାଇ ମଧ୍ୟାହ୍ନରେ ରୋଷଇ କରି ଏକ ଗଛ ମୂଳେ ଖାଇବା ପାଇଁ ବସିବା ସମୟରେ ହଟାତ ବଜ୍ରପାତ ହୋଇଥିଲା। ଫଳ ରେ ଶିବଙ୍କ ଘଟଣା ସ୍ଥଳରେ ମୃତ୍ୟୁ ଘଟିଥିଲା ଓ ଦିଗପହଣ୍ଡି ବ୍ଲକ ବୋମକେଇ ପଞ୍ଚାୟତ ଖଇର ପଙ୍କ ଗ୍ରାମର ଡିଲି କନିଆରୀ, ଚାନ୍ଦପୁର ପଞ୍ଚାୟତ ବେଲପନ୍ଥି ଗ୍ରାମର ମଳି ଗୌଡ଼, ବାତରଡା ଗ୍ରାମର ଗଣପତି ନାଇକ ତିନିଜଣ ଗୁରୁତର ଆହତ ହୋଇଥିଲେ। ଆହତଙ୍କୁ 108 ସାହାଯ୍ୟରେ ବୋମକେଇ ଓ ଦିଗପହଣ୍ଡି ମେଡିକାଲକୁ ନିଆଯାଇଥିଲା। ପରେ ଅବସ୍ଥା ଗୁରୁତର ହେବାରୁ ବ୍ରହ୍ମପୁର ବଡ଼ ମେଡିକାଲ ସ୍ଥାନାନ୍ତର କରାଯାଇଛି। ଘଟଣା ସ୍ଥଳରେ ସ୍ଥାନୀୟ ସରପଞ୍ଚ ପ୍ରତିନିଧି ଉପେନ୍ଦ୍ର ସେଠି, ସମିତି ସଭ୍ୟ ଅକ୍ଷୟ କୁମାର ସେଠି, ଦିଗପହଣ୍ଡି ତହସିଲଦାର ନିରଞ୍ଜନ ସାହୁ ଓ ନୂଆପଡା ରାଜସ୍ୱ ନିରୀକ୍ଷକ ଦେବରାଜ ନାଇକ ପ୍ରମୁଖ ପହଞ୍ଚି ମୃତକ ପରିବାରକୁ ସମବେଦନା ଜଣେଇବା ସହ ଆହତଙ୍କ ଚିକିତ୍ସାରେ ସହଯୋଗ କରିଛନ୍ତି।